Nunavik STTA project

ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ

ᖃᕆᑕᐅᔭᒃᑯᑦ ᕿᒥᕐᕈᕋᑦᓭᑦ ᒫᑦᓯ 15, 2022-ᒥᑦ ᒫᑦᓯ 15, 2023-ᒧᑦ

ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ

Sanannguanitigut Makitaqatigiinniq

Standing Together Through Art

Debout ensemble à travers l’art

 

ᐊᑭᓇᓯ ᐹᑦᑐᔨ ▪ ᖄᓇ ᑐᒃᑐ ▪ ᐁᓴᒃ ᐹᑦᑐᔨ

ᑭᓕ-ᐋᓐ ᑎᕈᓯᔨ ▪ ᒥᐊᔨ ᐸᓂᖓᔭᒃ ▪ ᓂᐊᑉ

ᐱᕆᒻ ▪ ᐅᔮᐳ ᒍᐊᑦ ▪ ᐅᓕᕕᐊ ᐅᕕᓗᖅ

 

ᑖᓐᓇ ᖃᕆᑕᐅᔭᕈᑎᒃᑯᑦ ᑕᑯᑦᓴᐅᑎᑦᓯᓂᖅ ᑎᑭᐅᑦᔨᔪᖅ ᑲᑎᑦᓱᒋᑦ ᐱᓇᓱᐊᕐᑕᐅᓯᒪᔪᓂᒃ ᑖᒃᑯᓄᖓ ᑕᓪᓕᒪᐅᔪᓐᖏᒐᕐᑐᓄᑦ ᓴᓇᓐᖑᐊᑎᓄᑦ ᑖᒃᑯᐊᓗ ᐱᓇᓱᐊᕐᓯᒪᔭᖏᑦ ᑕᑯᔭᑦᓴᖑᕐᑎᓯᔪᑦ ᑕᒪᑐᒧᖓ ᐊᑑᑎᔭᐅᑎᓪᓗᒍ ᑖᓐᓇ COVID-19 ᖃᓂᒻᒪᓯᐊᓗᒃ ᓄᓇᕕᒻᒥᐅᑦ ᓴᓇᓐᖑᐊᑏᑦ ᐊᑯᕐᖓᓂ ᓄᓇᖃᕐᑐᑦ ᓄᓇᕕᒻᒥ ᐊᒻᒪᓗ ᓯᓚᑖᓂ ᓄᓇᕕᐅᑉ.

ᑖᓐᓇ ᑕᑯᑦᓴᐅᑎᑦᓯᓂᖅ ᕿᒥᕐᕈᓂᔪᖅ ᑕᒐ ᑕᐅᑐᒍᓯᕐᓂᒃ, ᐊᑑᑎᔭᐅᖃᑦᑕᑐᓂᒃ ᐊᒻᒪᓗ ᐱᓂᐊᕈᑕᐅᖃᑦᑕᑐᓂᒃ ᐊᒃᑐᐊᔪᓄᑦ ᐅᓚᐱᑦᓯᓱᑎᒃ ᑎᑭᐅᑦᔭᖏᓐᓂᒃ ᑎᑭᓐᓇᒥ ᑕᒪᑐᒪ ᖃᓂᒻᒪᓯᐅᑉ ᐃᓅᓯᑦᑎᓄᑦ ᑌᑲᓐᖓᓂᑦ ᐅᐱᕐᖔᖓᓂᑦ 2020ᑉ.  ᑖᓐᓇ ᖃᓂᒻᒪᓯᖅ ᐊᐅᓚᔭᕐᑎᓯᓕᕐᓱᓂ ᐱᐅᓯᕐᓂᒃ ᐃᓅᓯᕐᒥ ᑕᒣᑎᒍᑦ ᓯᓚᕐᕈᐊᓕᒫᒧᑦ ᓯᐊᒻᒪᑐᒥᒃ ᐊᒻᒪᓗ ᑎᑭᐅᑦᔨᒥᑦᓱᓂ ᐊᕐᓱᕈᐊᓪᓚᓇᕐᑐᒥᒃ ᐃᓄᓐᓄᑦ ᐊᒻᒪᓗ ᐃᓅᖃᑎᒌᓐᓂᓄᑦ, ᒥᓂᑕᐅᑎᓐᓇᒋᑦ ᑲᓇᑕ, ᑯᐯᒃ, ᐊᒻᒪᓗ ᓄᓇᓖᑦ ᓄᓇᕕᒻᒥ.  ᐊᓂᑦᑌᓕᓂᖅ ᐱᔭᕆᐊᑐᔪᒦᓐᓇᕈᓐᓇᑐᖅ ᐊᑕᐅᓯᐅᓈᕐᑎᑐᓄᑦ ᐃᓄᓐᓄᑦ ᐊᒻᒪᓗ ᐃᓪᓗᖃᑎᒌᓄᑦ ᐱᔭᕋᓕᓕᕇᕐᑐᓄᑦ ᐱᔪᖃᖃᑦᑕᑐᓄᑦ ᓯᕗᓂᐊᒍᐊᓪᓛᑦ ᐱᒋᐊᓚᐅᕐᑎᓇᒍ ᑕᒪᓐᓇ ᖃᓂᒻᒪᓯᖅ.  ᐊᓂᑦᑌᓕᓂᖅ ᐊᒻᒪᓗ ᓴᓂᒥᐅᑦᓯᑌᓕᓂᖅ ᓱᕐᕋᑎᑦᓯᒍᓐᓇᒥᑦᓱᓂ ᐃᓱᒪᒥᒃ ᐊᒻᒪᓗ ᖃᓄᐃᓐᖏᓯᐊᕐᓂᒥᒃ, ᓱᓕᓗ ᑕᒐ ᐊᓯᖏᓐᓂᒃ ᐊᕐᓱᕈᐊᓪᓚᓇᕐᒥᔪᓂᒃ ᑎᑭᐅᑦᔭᖏᓐᓂᒃ ᖃᓂᒻᒪᓯᐅᑉ ᑕᒪᑐᒪ, ᑕᒐ ᑲᑉᐱᐊᓱᓐᓂᖅ, ᑲᕙᕐᓇᑐᐃᑦ, ᕿᓄᖓᓇᕐᑐᑦ, ᐊᒻᒪᓗ ᐊᓕᐊᓇᓐᖏᑐᐊᓗᓐᓂᒃ.  ᑌᒣᒐᓗᐊᕐᑎᓗᒍ ᑕᒪᒃᑯᐊ ᐱᒐᓱᐊᕈᑕᐅᓚᕿᖃᑦᑕᑐᑦ, ᐃᓄᐃᑦ ᓄᐃᑦᓯᓯᒪᔪᑦ ᓲᖑᓂᕐᒥᒃ ᐊᒻᒪᓗ ᐊᓂᒍᐃᑲᓪᓚᓂᕐᒥᒃ ᒪᑭᑕᕕᖃᕐᓱᑎᒃ, ᐊᒻᒪᓗ ᐃᓚᖓᒍᑦ ᓄᑖᓄᑦ ᑲᒪᒍᓐᓇᕆᐊᒥᒃ ᐋᒃᕿᓯᒪᐅᑎᑦᓴᓄᑦ ᓵᖓᓂ ᑕᒪᑐᒪ ᐊᑑᑎᔫᑉ ᑕᒪᓐᓇᓗ ᓱᖏᐅᓐᓀᑑᑦᓱᓂ ᓇᐅᓕᒫᓄᑦ ᐊᒻᒪᓗ ᐱᓕᐅᒥᔮᕐᑐᒥᒃ ᐊᓯᑦᔨᑐᕐᓱᓂ.  ᐊᒻᒪᓗ ᓱᓕ, ᑐᓴᖃᑦᑕᑐᒍᑦ ᐃᓄᓐᓂᒃ ᓴᑑᒪᓇᕐᑐᓂᒃ ᖃᐅᔨᔪᓂᒃ ᐊᓂᑦᑌᓕᓐᓇᓂ, ᑕᒐ ᐊᓕᐊᓇᕐᑐᓂᒃ ᐊᑐᕐᓱᒋᑦ ᐅᒃᕙᓘᓐᓃᑦ ᐱᕕᑦᓴᖃᕐᓂᓴᐅᓕᕐᓂᒥᒃ ᑐᓂᒪᕕᒋᓗᒍ ᓱᖃᑦᓯᐅᑎᑦᓴᓂᒃ ᖃᐅᔨᑦᓱᒍ ᓇᒻᒥᓂᖅ ᐅᒃᕙᓘᓐᓃᑦ ᐃᓚᒌᑎᒍᑦ.

ᐊᑦᔨᒌᓐᖏᑐᓂᒃ ᐋᒃᕿᓯᒪᐅᑎᑦᓴᓂᒃ ᐱᑕᖃᕐᒪᑦ ᑲᒪᒋᐊᒥᒃ ᐊᕐᓱᕈᐊᓪᓚᓇᕐᑐᑦ ᐱᓕᕐᑎᓗᒋᑦ ᓇᓪᓕᐅᑐᒥ.  ᑕᒪᒃᑯᐊ ᐃᒻᒧᐊᓂ, ᐃᓚᐅᕕᖃᕐᓂᖅ ᓴᓇᓐᖑᐊᓂᕐᓂᒃ ᐱᒐᓱᐊᕐᓗᒍ ᓄᐃᑦᓯᒪᑦ ᓄᓪᓚᔫᒥᓯᒪᓇᕐᑐᓂᒃ ᐊᑑᑎᔪᓄᑦ ᐃᓄᓐᓄᑦ ᐊᕐᓱᕈᐊᓪᓚᓯᒪᓇᕐᑐᒦᑦᑐᓄᑦ.  ᓴᓇᓗᓂ ᐊᒻᒪᓗ ᐃᓱᒪᒐᓱᐊᕈᑎᒋᓗᒍ ᐱᓇᓱᐊᕐᑕᕆᔭᖅ ᑕᑯᒥᓇᕐᑐᓕᐅᕐᓗᓂ ᑎᑭᐅᑎᑎᑦᓯᒍᓐᓇᒪᑦ ᐃᒃᐱᓂᐊᕐᓂᓂᒃ ᐊᒻᒪᓗ ᖃᐅᔨᓕᕐᓗᒍ ᐊᒻᒪᓗ ᐃᒃᐱᓂᕈᑎᒋᓗᒍ ᐱᑐᒃᕕᖃᕐᓂᒥᒃ ᐊᓯᑦᑎᓄᑦ ᑕᒪᒃᑯᑎᒎᓇ ᖃᐅᔨᔭᐅᑎᑦᓯᒍᑎᒋᓗᒍ ᐃᒃᐱᓂᐊᕈᑎᑦᑎᓂᒃ ᐊᒻᒪᓗ ᖃᓄᐃᑦᑐᑰᓕᕐᓂᑎᓐᓂᒃ.

ᓴᓇᓐᖑᐊᓂᕐᒥᒃ ᐅᖃᐅᓯᖃᕐᓂᑯᑦ, ᐅᓇ ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ ᑕᑯᑦᓴᐅᑎᑕᐅᓂᖓ ᑎᒍᓗᒍ ᐱᒍᒪᕗᖅ ᐊᑐᕆᐅᕐᑐᓂᒃ ᐱᓚᐅᕐᓯᒪᓇᑎᒃ ᓇᓪᓕᐅᑐᓂ ᑖᒃᑯᓇᓂ 2020-2022ᒧᑦ ᖃᓂᒻᒪᓯᕐᒥ ᓯᓚᕐᕈᐊᓕᒫᒨᕐᓯᒪᔪᒥ.  ᐅᑯᐊ ᐱᓇᓱᐊᕐᑕᐅᓯᒪᔪᑦ ᐊᒻᒪᓗ ᐅᓂᒃᑳᑦ ᑲᑎᕐᓱᑕᐅᒪᔪᑦ ᑕᒪᑐᒧᖓ ᐃᓕᖓᓗᑎᒃ ᑕᑯᑦᓴᐅᑎᑦᓯᓂᕐᒧᑦ ᓄᐃᑕᒃᑫᒋᕗᑦᑕᐅᖅ ᐊᑦᔨᒌᓐᖏᓂᖏᓐᓂᒃ ᐊᑑᑎᔭᐅᖃᑦᑕᑐᑦ ᑕᒃᕙᓂ ᖃᓂᒻᒪᓯᕐᒥ ᐊᒻᒪᓗ ᓄᐃᑦᓯᓱᓂ ᐊᒥᓱᐃᑎᒍᑦ ᐱᔪᓂᒃ ᐊᒻᒪᓗ ᑕᑯᒥᓇᕐᑐᓂᒃ ᓴᓇᓂᐅᑉ ᓄᐃᑦᓯᒍᓐᓇᓂᖓᓂᒃ ᓴᒃᕿᑎᑦᓱᒍ.  ᑖᓐᓇ ᑕᑯᑦᓴᐅᑎᑦᓯᓂᖅ ᑫᒥᑦᓯᔪᓐᓇᒥᔪᖅ ᑕᑯᔭᕐᑐᑐᓄᑦ ᓴᖑᕕᖃᕈᓐᓇᓂᕐᒥᒃ ᓴᒃᕿᑎᕆᓂᕐᒥᒃ ᐊᒻᒪᓗ ᐊᐅᓚᔨᒐᑦᓴᑖᕐᓂᐅᑉ ᓲᖑᓂᖓᓂᒃ ᓴᓇᓐᖑᐊᓂᐅᑉ ᐱᔭᕋᓕᓐᓇᑐᑦ ᓇᓪᓕᐅᓯᒪᑎᓪᓗᒍ ᑕᒐ ᑲᑐᑦᔨᓗᓂ ᐱᒐᓱᐊᕐᓂᒥᒃ ᐃᓅᕕᒋᖃᑦᑕᓯᒪᓕᕐᑕᑎᒍᑦ ᑕᒪᒃᑯᓇᓂ ᑕᒃᕿᓂ ᖄᖏᕐᑐᓂ.

 

ᐅᓕᕕᐊ ᓕᐊ ᑑᒪᓯ ᐊᒻᒪᓗ ᔭᓂᒃ ᔭᓐᓴᓐ-ᓚᕗᓗ, ᑲᒪᔨᒻᒪᕇᒃ ᐊᒻᒪᓗ ᐊᑕᐅᑦᓯᑰᑎᓯᔩᑦ ᖃᓄᕐᑑᕈᑕᐅᓯᒪᔪᓂᒃ.