ᐁᓴᒃ ᐹᑦᑐᔨ

ᐁᓴᒃ ᐹᑦᑐᔨ

ᐁᓯᒃ ᐹᑐᕆᑦᔅ ᐃᓄᒃ/ᒨᖄᒃ/ᓯᑳᑦᓯ ᑕᑯᒐᑦᓴᓂᒃ ᓴᓇᖕᖑᐊᑎ ᐱᓇᓱᐊᕈᑎᖃᓲᖅ ᐊᓪᓚᖑᐊᕐᓂᒥᒃ ᐊᒻᒪᓗ ᖃᓪᓗᓈᕐᑕᓂᒃ. ᓄᐊᕗᐃᒥᐅᒍᓯᒪᔪᖅ ᐊᒻᒪᓗ ᑖᕙᓂ ᐱᓇᓱᐊᕐᓯᒪᑦᓱᓂ, ᐊᒻᒪᓗ ᐅᓪᓗᒥ ᐊᓐᑎᐊᔨᔪᒦᓕᕐᑐᖅ ᐱᓇᓱᐊᕐᓱᓂ ᓴᓇᖕᖑᐊᑎᒥᒃ ᐃᑲᔪᕐᑎᐅᓱᓂ ᐊᓈᓇᒥᓂᒃ ᑕᑯᒐᑦᓴᓂᒃ ᓴᓇᖕᖑᐊᑎᐅᒻᒪᑦ.

ᐱᑦᔪᑎᒋᑦᓱᒍ ᓇᓪᓕᓂᖅ ᐊᓪᓚᖑᐊᕐᑕᕕᓂᖓ, ᓇᓗᓀᕐᓯᒪᔭᖓ ᐃᒫᒃ, “ᖃᕆᒐᓗ ᑖᒃᑯᑑᓯᒪᔪᒍᒃ ᐃᓚᕗᓪᓗ ᐅᖓᓯᑦᑐᒥᐅᒍᑦᓱᑕ, ᐊᒻᒪᓗ ᑖᒃᑯᐊ ᓇᓪᓕᓇᕐᑑᒃ ᐆᒻᒪᑎᒻᒥᐅᑕᕗᑦ ᐃᓚᑖᕆᓯᒪᔭᕗᑦ, ᑕᑯᑲᓪᓚᒍᒪᑦᓱᒋᑦ ᐊᓇᕐᕋᑲᓪᓚᒍᒪᐅᑎᒋᓚᐅᔪᔭᕗᑦ. ᐱᓗᐊᕐᑐᒥᒃ ᖃᓂᒪᓐᓇᖅ ᐃᕐᐸᓯᒪᑎᓗᒍ, ᐃᑉᐱᒍᓱᑦᓱᖓ ᓄᓇᓕᖃᖕᖏᓂᕐᒥᒃ ᐊᒻᒪᓗ ᐃᓄᑑᑎᑦᓱᖓ, ᑖᒃᑯᓅᖓ ᖃᓄᐃᑦᑑᒐᓗᐊᕈᑦᑕ ᓇᓪᓕᒋᔭᐅᔪᒍᑦ ᐃᕐᖃᑐᕐᑕᐅᓚᐅᕐᓯᒪᑦᔭᒐᑕ, ᐊᒻᒪᓗ ᖁᖓᑦᑑᒃ ᐊᓪᓚᖑᐊᕐᓯᒪᔪᓃᑦᓱᑎᒃ ᑕᑯᑦᓴᐅᑎᑦᓯᔫᒃ ᐊᓕᐊᓇᕐᓂᒥᒃ ᐃᑉᐱᒍᓱᑦᓱᑎᒃ ᐃᑉᐱᒋᒻᒥᔭᕐᓃᕙᖓ. ᑖᑯᔅ ᐊᒻᒪᓗ ᕙᓚᕕ ᑖᕐᑐᒦᑦᑎᓗᑕ ᖃᐅᒪᓂᐅᕘᒃ.” ᐱᑦᔪᑎᒋᑦᓱᒋᑦ ᐊᓯᖏᑦ ᓴᓇᖕᖑᐊᓯᒪᔭᖏᑦ, ᑐᑭᓯᑎᑦᓯᔪᖅ: “ᓇᑦᓯᓯᐅᕐᓂᒥᒃ ᐊᑑᑎᓚᐅᕐᓯᒪᖕᖏᑐᖓ, ᑭᓯᐊᓂ ᐊᓪᓚᖑᐊᕐᓂᑯᑦ, ᐊᑑᑎᒍᒪᓲᕐᓃᕙᖓ ᐊᒻᒪᓗ ᐃᓱᒪᒋᓲᕐᓃᕙᖓ ᒍᓐᓇᕕᖃᕐᑐᖓ. ᑖᒃᑯᓂᖓ ᒥᓂᑕᐅᒍᑎᒋᓯᒪᔭᕐᓃᕙᖓ ᐊᑑᑎᓯᒪᑦᔭᓇᒋᑦ ᓂᐳᓲᒍᔪᖓ ᐊᓪᓚᖑᐊᕐᓂᑯᑦ ᑕᑯᑦᓴᐅᑎᑦᓱᒋᑦ. ᐊᕿᒡᒋᖑᐊᖅ ᑕᑯᑦᓴᐅᑎᑦᓯᔪᖅ ᐯᖕᖑᓂᕐᓃᕙᖓ ᐸᑕᕆᑦᔅᓂᒃ ᐃᓚᓐᓃᕙᖓ ᑰᑦᔪᐊᒥᐅᓂᒃ (ᐊᑦᓯᔭᐅᓯᒪᔪᑦ ᐊᕿᒡᒋᒥᒃ ᓴᐅᓂᖃᕐᑎᓗᒋᑦ), ᐊᒻᒪᓗ ᕿᓱᕐᑑᑕᐅᔭᖕᖑᐊᑦ ᐃᓕᓯᒪᑦᓱᒋᑦ ᓄᓇᕕᒻᒥ ᐱᕈᓲᒍᑎᓪᓗᒍ ᐱᐅᒋᒐᒃᑯ. ᐊᑯᓂ ᑰᑦᔪᐊᒧᑦ ᐅᑎᕈᓐᓀᑐᖓ, ᐊᒻᒪᓗ ᑖᕙᓃᑦᑑᔮᕈᑎᖃᕐᓯᒪᑦᓱᖓ ᐊᓪᓚᖑᐊᕐᓱᒋᑦ ᐊᕿᒡᒋᖑᐊᑦ, ᑕᑯᑦᓴᐅᑎᑦᓯᔪᑦ ᐃᓚᓐᓃᕙᖓ.