ᐅᓕᕕᐊ ᐅᕕᓗᖅ

ᐅᓕᕕᐊ ᐅᕕᓗᖅ

ᐅᓕᕕᐊ ᐅᕕᓗᖅ (ᐅᓕᕕᐊ ᓕᐊ ᑑᒪᓯ) ᑖᓐᓇ ᐊᒥᓱᐃᓕᕆᒍᓐᓇᑐᖅ ᓴᓇᓐᖑᐊᑎ ᑲᖏᕐᓱᒥᐅᖅ, ᓄᓇᕕᒻᒥ, ᐸᓂᒋᔭᐅᑦᓱᓂ ᐃᓄᒻᒧᑦ ᐊᓈᓇᖃᕋᒥ ᐊᒻᒪᓗ ᑯᐯᒃᑯᐊᒥᒃ ᐊᑖᑕᖃᕐᓱᓂ.  ᐅᓕᕕᐊ ᐃᓕᑦᓯᒋᐅᕐᑐᕕᓂᖅ ᐱᔭᕆᐅᕐᓂᖑᕐᕕᒋᓪᓚᕆᑦᓱᒍ ᐱᐅᓯᑐᖃᕐᑎᒍᑦ ᓴᓇᓐᖑᐊᕈᓯᕐᓂᒃ ᑌᑰᓇ ᓴᐸᖓᓕᕆᓂᕐᒥᒃ ᑲᑎᒪᓂᐊᕈᓯᖃᕐᑎᓗᒋᑦ ᑌᑲᓂ ᓄᓇᓕᑐᙯᑦ ᐅᕕᒐᕐᑐᐃᑦ ᑲᑎᒪᓂᖃᕐᑎᓗᒋᑦ 2017ᒥ.  ᑖᓐᓇ ᑲᔪᓯᑐᐃᓐᓇᓱᒍ ᐃᓕᑉᐸᓕᐊᑦᓱᓂ ᑌᒫᒃ ᐃᒻᒥᓅᕈᑎᒋᑦᓱᒍ ᐃᓕᑦᓯᒐᓱᐊᕐᓱᓂ, ᓯᐅᒻᒥᐅᑕᓕᐅᕐᓱᓂ ᐊᒻᒪᓗ ᐊᓯᖏᓐᓂᒃ ᒥᑭᔪᐊᐱᐅᑦᓱᑎᒃ ᑎᒍᑦᓴᓂᒃ.  ᑖᑦᓱᒪ ᓴᐸᖓᓕᒃ ᐊᐅᐸᕐᑑᓱᓂ ᐊᒪᐅᓯᐊᕕᓂᖓ ᑕᑯᑦᓴᐅᑎᑕᐅᕗᖅ ᑌᑲᓂ La Guildeᒥ ᑕᓪᓕᒪᐅᒍᑎᒋᓕᕐᑕᖓᓂᐅᒃ ᓄᐃᑎᑕᐅᓂᖓᑕ ᐅᓪᓗᒥᓂᑕᕐᓂᒃ ᓄᓇᓕᑐᙯᑦ ᓴᓇᓐᖑᐊᑕᖏᑦᑕ Biennial (BACA).

ᐅᓕᕕᐊ ᓱᓕ ᐱᓇᓱᐊᖃᑎᖃᕐᓂᒥᑦᓱᓂ ᑖᒃᑯᓂᖓ Wapikoni Mobile, ᑐᓴᐅᒪᔭᐅᑎᑦᓯᓂᕐᒥᒃ ᑖᑦᓱᒥᖓ ᑎᓕᔭᐅᒪᐅᑎᒥᒃ, ᐃᓪᓕᓇᕐᑐᖁᑎᓂᒃ, ᑐᕌᕐᑕᐅᔪᒪᔪᓂᒃ, ᐊᒻᒪᓗ ᐊᕐᕕᑕᕐᓂᖏᓐᓂᒃ ᑖᑦᓱᒪ ᑎᒥᒻᒪᕆᐅᑉ ᐱᓇᓱᐊᕈᑎᖏᑦᑕ ᑌᑰᓇᐅᑎᓪᓗᒍ ᖃᐅᔨᒪᔭᐅᑎᑦᓯᓂᕐᒧᑦ ᑲᑎᒪᓂᐊᕈᓯᖏᓐᓂ ᐊᑑᑎᖃᑦᑕᑎᓪᓗᒋᑦ ᐃᓕᓵᕐᓚᓄᑦ, ᐱᓐᖑᐊᓂᕐᔪᐊᓂ ᑲᑎᔪᓄᑦ, ᐊᒻᒪᓗ ᐱᐅᓯᑐᖃᓕᕆᔪᑦ ᑲᑎᓂᖏᓐᓂ.  ᑐᑭᒧᐊᑦᑎᓯᓐᓂᒥᓱᓂ ᐊᐅᓚᔫᓕᐊᒥᒃ ᑕᑭᔫᓐᖏᑐᒥᒃ Wearing my culture ᒥᒃ (2018), ᐊᒻᒪᓗ Not just a Missing or Murdered Aboriginal Woman (2019) ᓂᐸᕐᓯᒪᑐᐃᓐᓇᔭᖏᑦᑐᖅ ᐅᒃᕙᓘᓐᓃᑦ ᐃᓄᐊᕐᑕᐅᓯᒪᔪᖅ ᓄᓇᓕᑐᖃᖅ ᐊᕐᓇᖅ.  ᐅᓕᕕᐊ ᓱᓕ ᓱᓕᔪᓐᖑᐊᒍᓐᓂᒥᔪᖅ ᑌᑲᓂ ᑕᓚᕖᓴᒃᑯᑦ-ᐃᓚᒃᖁᐊᕇᓂ Epidemieᒥ ᐊᒻᒪᓗ ᐃᓚᐅᕕᖃᕐᓂᒥᑦᓱᓂ ᐊᐅᓚᔫᓕᐊᓄᑦ ᐃᓕᑕᕆᔭᐅᒍᑎᑖᕐᓯᒪᔪᒧᑦ ᓱᓕᔪᓐᖑᐊᒧᑦ ᐋᓛᐱ-ᒥᒃ ᐊᑎᓕᒃ.  ᑖᓐᓇ ᑕᒐᑕᒐ ᐱᓇᓱᐊᒐᑦᓴᓄᑦ ᑲᔪᓯᒃᑫᔨᐅᕗᖅ ᑌᑲᓂ ᐊᐅᒫᒡᒋᕕᒻᒥ, ᑖᕙᓂ ᓄᓇᕕᒻᒥ ᓴᓇᓐᖑᐊᑏᑦ ᐊᓪᓚᕕᖓᓐᓂ ᑌᑲᓂ ᐊᕙᑕᖅ ᐱᐅᓯᑐᖃᓕᕆᕕᒻᒥ, ᐱᓇᓱᐊᕐᓱᓂ ᐃᑲᔪᕐᓱᒋᑦ ᐊᒻᒪᓗ ᑐᓴᐅᒪᔭᐅᑎᑦᓯᓂᕐᒥᒃ ᓄᓇᕕᒻᒥ ᓴᓇᓐᖑᐊᑎᖏᓐᓂᒃ.