ᑲᒪᔨᒻᒪᕆᖏᑦ

ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ: ᓄᑖᓐᖑᓇᕐᑐᒥᒃ ᐊᓂᕐᓵᕕᖃᕐᓂᖅ

ᐊᓪᓚᑕᖓ ᔭᓂᒃ ᔮᓐᓇᓐ-ᓚᕗᓗ

ᓯᕿᓐᓂᓚᐅᔪᕗᖅ ᑌᑦᓱᒨᓇᐅᑎᓪᓗᒍ ᐅᓪᓗᖓ ᔫᓂ 2020ᒥ, ᑕᒃᖀᑦ ᐱᖓᓱᑦ ᑭᖑᓂᖓᒍᑦ ᐅᐃᒪᓇᕐᑐᖃᓚᐅᕐᑎᓗᒍ ᖃᓄᐃᑦᔪᑎᖃᓕᕐᓂᒪᑦ ᐅᖃᕐᑕᐅᔪᒥᒃ ᑌᑲᓂ ᑯᐯᒃ ᓯᑎᒥ ᐃᑯᓪᓚᑎᑕᐅᒋᐊᕋᓱᐊᕐᑎᓗᒍ COVID-19 ᖃᓂᒪᓐᓈᓗᒃ.  ᐊᐅᓪᓚᓱᑕ ᒪᓐᑐᔨᐊᓚᒥᑦ ᐃᒃᐸᓴᖓᓂ ᓴᓂᕐᕙᓯᒪᒋᐊᕐᑐᓕᕐᓱᑕ ᑌᑲᓂ Gaspe Peninsulaᒥ.  ᐱᓱᑦᓱᖓ ᐱᓱᒃᕕᑯᑦ ᕿᔫᑦᓱᑎ ᑕᓴᒧᖓ ᑐᕌᕐᑐᓄᑦ ᑕᕆᐅᕐᒧᑦ ᐊᒻᒪᓗ ᑎᑭᐅᑎᒐᒪ ᐃᓱᐊᓄᑦ ᒪᔪᕋᐅᑏᑦ, ᐃᒃᐱᓂᕐᓱᖓ ᑎᑭᑕᐅᒐᒪ.  ᑕᒪᕐᒪ ᐃᓗᐃᑦᑐᒥᒃ ᐃᒃᐱᓂᕐᓱᒍ.  ᑎᐸᖓ ᓀᑦᓱᒍ ᕿᒃᖁᐊᑦ ᐊᒻᒪᓗ ᑐᐊᐸᔮᑦ ᓂᕈᒥᑦᑎᑕᐅᔪᑦ ᓯᕿᓂᕐᒧᑦ.  ᑐᓴᕐᓴᐅᔪᓪᓗ ᐃᖏᐅᓖᑦ ᓲᕐᓗ ᓇᐅᔦᓪᓗ ᓇᓪᓕᑳᑦᓱᑎᒃ ᑐᓴᕐᓭᑦ ᑭᐅᒪᐅᑎᔫᔮᕐᓱᑎᒃ.  ᐊᓄᕆᓘᓇ ᓄᔭᑉᐱᓚᕿᑎᓪᓗᖓ ᐊᒻᒪᓗ ᑮᓇᕐᓂᒃ ᐅᓕᑦᓯᔪᑦ.  ᐊᒻᒪᓗ ᓄᐃᑕᔪᖅ ᑕᒪᓐᓇ ᑐᖑᑦᓱᕆᑦᑐᖅ, ᑕᒪᑐᒪ ᑕᑯᒥᓇᕐᑑᑉ ᐊᒻᒪᑕᖓ ᓴᒃᕿᓕᕋᒥ.  ᐃᒃᐱᓂᕋᒪ ᑎᒥᓐᓂ ᓲᕐᓗ ᓄᑖᒥᒃ ᐃᕐᓂᐊᖑᔪᖓ.  ᓲᕐᓗ ᐱᔪᖅ ᐊᓂᕐᓵᕕᓕᒃ ᐃᑎᔪᒥᒃ ᐊᓂᕐᓵᓂᕐᒥᒃ ᓄᑖᒥᒃ ᐃᓅᓱᓐᖒᒥᓇᕐᑐᒥᒃ.

ᑌᒃᑯᐊ ᐱᒋᐊᓕᕐᑎᓗᒍ ᑕᒃᖀᑦ ᑌᓐᓇ ᖃᓂᒪᓐᓈᓗᒃ ᐱᔭᕋᓕᓐᓇᓚᐅᔪᕗᑦ ᐅᕙᑦᑎᓄᑦ ᐊᒥᓱᑎᒍᑦ.  ᑕᒪᓐᓇ ᓂᕆᐅᓇᓐᖏᑐᒃᑯᑦ ᐅᓚᐱᑦᓯᓂᖓ ᖃᐅᑕᒫᕐᓯᐅᑎᒥᒃ ᐃᓅᓯᕐᒥᒃ, ᐃᓚᒌᓂ ᐊᒻᒪᓗ ᐃᓄᐃᑦ ᑲᑎᓂᕆᓲᖏᓐᓂᒃ, ᐱᐅᓯᑐᐃᓐᓇᐅᓲᒥᒃ ᐊᒻᒪᓗ ᑕᒪᒃᑯᐊ ᖃᐅᑕᒫᕐᓯᐅᑏᑦ ᐃᓱᒪᒋᓪᓗᐊᑕᐅᓲᒍᓐᖏᑐᓪᓘᓃᑦ.  ᑎᑭᑲᓪᓚᑐᖃᕐᒪᑦ, ᐊᓱᐃᓚᐅᓕᕐᒪᑦ ᐱᖔᓕᐅᑎᒻᒪᑦ ᓱᓕᔫᔮᓐᖏᑐᒥᒃ ᐱᔪᖃᓕᕐᒪᑦ.  ᒪᓐᑐᔨᐊᓚᒥᓕ, ᐃᓄᖏᑦ ᐊᒃᖁᓴᐅᑎᖃᑦᑕᓕᕐᓱᑎᒃ ᒪᓗᒍᓱᑦᑐᑦ ᐊᒃᖁᑎᓂ ᓄᓪᓚᖓᑦᔭᒍᓐᓀᓱᑎᒃ, ᐅᒃᐱᓯᐊᑦᔭᒍᓐᓀᓱᑎᒃ ᑕᑎᑌᕈᑦᑐᑎᑐᑦ, ᓴᓂᒥᐅᑦᓯᑌᓕᒐᓱᐊᕐᑐᑦ.  ᓂᐅᕕᕐᕕᐊᕈᕐᓂᓗ, ᒪᑐᓕᔭᕐᑐᑦ, ᐃᓱᒫᓗᑦᑐᐊᓘᕙᓗᑦᑐᑦ ᑕᑯᑦᓭᑦ ᓂᐅᕕᕋᓱᒃᑐᑦ ᑲᑎᓯᒐᒥᒃ ᓂᐅᕕᕐᑎᓯᔨᓂᒃ, ᑕᑯᓐᓇᕋᓱᐊᕆᐅᑎᔪᑦ ᐊᓯᒥᓄᑦ.  ᐱᑲᓪᓚᑐᒥᒃ, ᐃᓅᕕᒋᒋᐊᖃᓯᑦᓱᒍ ᑕᒪᓐᓇ ᐱᒋᐅᕐᑐᖅ ᐃᓱᒪᒐᓱᐊᕈᑎᖃᕆᐊᖃᕐᕕᒋᓕᕐᑕᕗᑦ ᐊᑐᕆᐊᓕᒃ ᐊᐅᓚᑦᔭᕆᐊᕐᓂᐊᐱᐅᒐᓗᐊᓂᒃ ᐊᖏᔫᓐᖏᑲᓗᐊᕐᐸᑕ.  ᐊᒡᒉᑦ ᐊᑦᑑᐱᖃᑦᑕᑐᑦ.  ᑎᕐᑐᓗ ᐊᓂᕐᑎᕆᕕᕗᑦ.  ᐃᕐᕈᑐᑦᓯᐊᖏᓐᓇᖃᑦᑕᓕᕐᓂᖅ.  ᐊᓂᕐᑎᕆᕕᕗᓪᓗ ᓂᐅᒃᖃᑌᓕᕕᒋᒋᐊᓕᕐᓱᒍ ᐊᓯᑦᑎᓂᑦ ᐱᔪᒥᒃ ᐳᕙᒻᒥᐅᓯᖁᓇᑕ ᐊᓯᑦᑎᓅᒃᙯᖁᓇᑕᓗ.  ᑕᑯᑦᓴᒥᒃ ᐃᓱᒫᓗᓐᓇᓕᕐᓱᓂ.  ᐊᒻᒪᓗ ᒪᑯᐊ ᐃᓅᖃᑎᒌᓐᓂᐅᓲᑦ ᐱᐅᓯᕆᑦᓱᒋᑦ ᐊᑯᓐᓇᑎᓐᓂ ᑌᒪ ᐱᔭᕋᓕᓐᓇᓕᕐᓱᑎᒃ ᓇᐅᒃᑯᓕᒫᖅ,

ᓴᐳᓐᓂᐊᕈᒪᔪᖃᕈᓂ ᐊᓯᑦᑎᓂᒃ ᑕᒐ ᐅᕙᒋᔭᕐᓂᒃ ᓴᐳᓐᓂᐊᑐᑦᓴᐅᔪᒍᑦ, ᐅᖃᕐᐳᖅ ᐅᓕᕕᐊ ᐅᖄᓕᕋᒥ ᐅᖃᐅᓯᕆᑦᓱᒍ ᒪᑐᐃᑦ ᐱᑦᓱᒋᑦ ᕿᓄᐃᕐᓴᓱᓂ ᓱᖃᑦᓯᑎᓕᕕᓂᖅ ᓱᓚᑳᕐᓱᓂ ᐅᐱᕐᖔᖓᓂ 2020ᑉ, ᑌᑰᓇᐅᑎᓪᓗᒍ ᑕᑯᕐᖓᓇᕐᑐᖅ ᐱᓕᕐᑎᓗᒍ ᑭᓪᓕᕆᔭᐅᑦᓱᓂ ᑎᑭᑦᑐᖅ ᐱᒋᐊᕐᓱᓂ ᑕᒪᓐᓇ COVID-19 ᐃᓅᓯᑦᑎᓄᑦ.  ᐅᓇ ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ ᐱᓇᓱᐊᕐᑕᐅᔪᖅ ᓄᐃᔪᕕᓂᖅ ᐊᐅᓚᑦᔦᓱᓂ ᑕᒪᑐᒧᖓ ᓱᒐᓗᑦᑐᖅ ᐊᑑᑎᔭᐅᓕᕋᒥ ᐃᓚᖏᐅᑎᔪᖅ, ᐊᐅᓚᑦᔭᑕᐅᓂᖅ ᑕᒪᑐᒧᖓ ᓯᓚᕐᕈᐊᓕᒫᒧᑦ ᐊᑑᑎᔪᖅ ᐃᒫᒃ ᓱᕐᕃᓚᕆᑦᑐᖅ ᐊᓯᑦᔩᓱᓂ ᖃᐅᑕᒫᑦ ᐃᓅᓯᑦᑎᓄᑦ ᐊᒻᒪᓗ ᐃᑌᓐᓂᓱᓂ ᐃᓱᒪᒋᓐᖑᐊᕈᓐᓇᑕᑦᑎᓂᒃ.  ᑌᒪᓐᖓᓂᐅᓕᓚᐅᔪᒻᒪᑦ ᑕᒐ, ᐃᓚᖏᑦᑕ ᓄᓇᕕᒻᒥᐅᑦ ᓴᓇᓐᖑᐊᑏᑦ ᐊᒥᒐᓐᖏᑐᒥᒃ ᐊᖏᕐᓯᒪᐅᑎᖃᕐᐳᑦ ᓄᐃᑦᓯᒋᐊᒥᒃ ᖃᐅᔨᓯᒪᓕᕐᑕᒥᓐᓂᒃ ᖃᓂᒻᒪᓇᖃᕐᑎᓗᒍ, ᐊᓪᓚᖑᐊᕐᑐᑦ ᐃᓱᒪᒋᓐᖑᐊᑕᒥᓂᒃ ᐊᒻᒪᓗ ᑕᑯᔭᑦᓴᖑᕐᑎᓱᒋᑦ ᐅᕙᑦᑎᓄᑦ ᓄᐃᑕᒥᓂᒃ ᐱᓇᓱᐊᕐᓱᒋᑦ.

ᖃᓂᒪᓐᓈᓗᒃ ᑲᑉᐱᐊᓇᕐᑑᕗᖅ.  ᓯᓚᕐᕈᐊᓕᒫᒥ ᑲᑉᐱᐊᓈᖀᔪᖅ, ᑭᓯᐊᓂ ᐅᓇ ᐃᒫᒃ ᓯᕗᓪᓕᐸᐅᑎᓪᓗᒍ ᐊᑑᑎᔭᐅᕗᖅ ᐊᒻᒪᓗ ᐊᖏᓂᕐᐸᐅᓕᕐᓱᓂ ᐅᓇ ᒪᓐᓇᐅᕗᖅ ᐃᒻᒥᓅᕐᕕᒋᑦᓱᒍ ᐃᓂᑦᓴᖅ ᐊᑕᐅᓯᐅᑦᑎᑐᓄᑦ ᐃᒻᒥᑯᑦ.  ᐊᓂᕐᕋᒥᓂ, ᑎᒥᒥᑎᒍᑦ, ᐃᓅᖃᑎᖃᕈᓯᖅ ᐃᓅᖃᑎᒧᑦ.  ᓱᓕᓗ, ᐃᓱᒪᒋᔭᐅᓕᕋᒥ ᑲᑉᐱᐊᓇᕐᑐᑰᕐᓂᐅᑉ ᐊᐅᓚᑦᔮᖀᑲᓪᓚᓂᖓ ᐃᒃᙯᓇᕐᐳᖅ ᑌᒃᑯᓂᖓ ᐱᔭᕋᓕᓐᓇᑑᓯᒪᔪᓂᒃ ᓇᓪᓕᐅᓯᒪᔪᓂᒃ, ᐱᑲᓪᓚᑐᓂᒃ, ᐋᓪᓛᑦ ᑐᑭᒧᐊᒍᓐᓀᓂᕐᒥᒃ, ᑲᑉᐱᐊᓇᕐᑐᑰᕐᓂᖅ ᓱᓕ ᐊᑐᕐᓇᑑᒻᒥᔪᖅ ᖃᐅᑦᔨᑎᒋᓕᕐᓱᒍ.  ᖃᐅᑦᔨᑎᒋᓕᕐᓱᒍ ᑕᑯᑦᓴᐅᓇᑎᒃ ᐱᔪᓂᒃ ᐊᒻᒪᓗ ᑕᑯᑦᓴᐅᖏᑦᑐᓂᒃ.  ᓄᐃᑦᓯᔪᖅ ᓄᑖᒥᒃ ᑕᑯᓚᕿᐅᑎᒋᑦᓱᒍ ᐱᐅᓯᑐᐃᓐᓇᐅᓲᒍᒐᓗᐊᓂᒃ ᐃᓱᒪᒋᑦᔭᓇᒋᓘᓐᓃᑦ.  ᐊᐅᓚᑦᔦᒍᓐᓇᐳᖅ ᐊᒻᒪᓗ ᐱᒐᓱᐊᓚᖀᒍᓐᓇᓱᓂ ᐱᐅᓯᑐᐃᓐᓇᐅᓲᒍᒐᓗᐊᒥᒃ.  ᑲᑉᐱᐊᓇᕐᑐᑰᕐᓂᖅ ᑕᒐ ᑌᒣᒻᒪᑦ ᓱᓕ ᐱᕕᑦᓴᐅᓕᕈᓐᓇᒥᔪᖅ, ᓂᕆᐅᓐᓂᖃᕐᓂᒥᐊᓪᓛᑦ.  ᑌᒣᓗᐊᓲᒍᑦᔭᖏᒻᒪᑦ ᑕᑯᓲᕆᑦᔭᖏᓐᓇᑎᒍ ᐃᒃᐱᓇᕐᓯᒪᑦ ᐊᑕᐅᑎᓂᖅ ᐱᑐᑦᓯᒪᔪᑐᑦ ᐃᓄᐃᑦ ᐊᓯᒥᓄᑦ ᓄᓇᕐᔪᐊᒥᐅᑎᒍᑦ ᐱᑎᓪᓗᒍ.  ᓱᕐᕃᓂᕆᓲᖓ ᐃᓅᔪᑦ ᐱᓇᓱᐊᕐᓂᕆᓲᖏᓐᓂᒃ ᐊᕙᑎᒥᓂ.  ᐊᒻᒪᓗ ᑕᒐ ᑌᒣᓗᐊᓲᒍᑦᔭᒥᒐᓂ ᐃᓱᒪᓇᕐᓂᖓ ᑌᒣᒍᓐᓇᓂᖓᑕ ᐁᑦᑐᑑᑕᐅᒍᓐᓇᑐᖅ ᐱᐅᓯᕐᑖᕆᑦᓱᒍ ᐃᓱᒪᒋᔪᓐᓇᑕᑦᑎᓂ.  ᐁᑦᑐᑑᑕᐅᒍᓐᓇᓂᖓ ᖃᓂᒻᒪᓯᐅᑉ, ᑖᓐᓇᐅᒪᑦ, ᑭᓯᐊᓂᓗ ᓱᓕ ᐁᑦᑐᑑᑕᐅᒍᓐᓇᒥᔪᖅ ᐃᓱᒪᑦᓴᖅ, ᐁᑦᑐᑑᑕᐅᒍᓐᓇᒥᔪᖅ ᐃᒃᐱᒋᔭᕆᔭᖅ, ᒪᑯᐊᓗ ᐅᓂᒃᑳᑦ, ᑕᑯᔭᑦᓭᓗ.  ᐱᔭᕆᐊᑐᒻᒥᓱᓂ ᐊᒥᓱᓄᑦ ᐃᒃᐱᓂᕈᒪᓇᒍ ᑐᑭᖓ ᓇᓗᕐᑎᓇᕐᑐᖅ ᐱᓪᓗᒍ ᑕᒪᓐᓇ ᖃᓂᒻᒪᓯᖅ.  ᖃᓄᐃᓕᓗᑕ ᐃᒃᐱᒋᓐᖏᑕᕆᓚᕗᑦ ᓄᓪᓚᓯᐊᕐᓇᓂᖓ ᐃᒫᒃ ᑕᑦᓱᒪᐅᑉ ᐊᑐᕈᓐᓀᑎᓪᓗᒍ ᐱᐅᓯᑐᐃᓐᓇᓲᖅ ᑕᒃᕙᖓᑦ ᑎᑭᐅᑦᔭᕕᓂᖏᑦᑕ ᐊᒥᓱᐃᑎᒍᑦ ᐱᓚᐅᕐᑐᑦ? ᑕᒐᓗ ᓄᒃᕿᓚᑦᑐᑦ ᓄᓪᓚᔫᒥᒐᒥᒃ ᐊᖑᒪᒡᒐᕋᓱᐊᕆᐊᓖᑦ ᐱᓇᓱᕆᐊᖃᕐᕕᐅᔪᑦ ᐅᓪᓗᐃᑦ.  ᓱᕐᕓᕈᑦᑐᓗ ᐱᑌᕈᒃᑲᒥ ᖁᓕᑦᑎᒍᑦ ᐃᖏᕐᕋᐸᑦᑐᑦ ᖃᖓᑦᑕᔫᑦ.  ᑕᑯᑦᓴᐅᓕᕐᑐᑦ ᒪᑯᐊ ᐃᖏᕐᕋᕕᐅᒍᓐᓀᕋᒥᒃ ᓄᓇᒃᑰᔫᓄᑦ ᐃᓪᓗᒐᓴᕐᔪᐊᑦ ᐃᒻᒧᐊᓂ ᑲᑎᕆᕖᑦ ᑌᑰᓇ ᐊᓂᑦᑌᓕᓐᓇᓂ.  ᑭᓯᐊᓂ ᐊᔪᒉᑉᐳᖅ ᐃᒃᐱᒋᑦᔭᖏᒃᑯᑎᒍ ᑕᑯᔪᒥᓇᓐᖏᑐᖅ ᖁᕕᐊᓲᑎᑦᓴᐅᓇᓂ ᑕᒪᓐᓇ ᐊᑑᑎᔪᖅ ᐃᒫᒃ ᓯᕐᓕᕿᓇᕐᑐᐊᓗᑦᑕᖃᕐᓱᓂ ᓄᐃᔪᐊᓘᒐᒥ.  ᑭᑦᓴᓇᕐᑐᐊᓗᒃ ᐊᑦᓱᑦ, ᓱᒃᑯᓇᕐᑐᐊᓗᒃ ᐊᒻᒪᓗ ᐱᐅᑦᔭᒐᓂ ᓈᒻᒪᔭᖏᓐᓇᒥ.

ᓴᐳᓐᓂᐊᕈᒪᓂᖅ ᐊᓯᑦᑎᓂᒃ ᑕᒐ ᓴᐳᓐᓂᐊᓗᑕ ᓇᒻᒥᓂᖅ ᐅᕙᒋᔭᕐᓂᒃ.  ᐊᒻᒪᓗ ᐅᖑᒪᓂᖅ ᐅᕙᑦᑎᓂᒃ ᐅᖑᒪᓂᐅᕗᖅ ᐊᓯᕗᑦᑕᐅᖅ ᐱᒻᒥᓗᒋᑦ.  ᐅᓇ ᐅᖃᐅᓯᕐᑕᖓ ᐅᖑᒪᓂᐅᑉ ᑐᓐᖓᕕᐅᕗᖅ ᑕᒪᑐᒧᖓ ᖃᓂᒻᒪᓯᕐᒧᑦ ᐊᑑᑎᔭᐅᔪᒧᑦ.  ᐅᖑᒪᓂᖅ ᐃᒣᓪᓗᓂ, ᑕᒐ ᐊᑕᐅᓯᐅᑉᐸᑦ, ᐊᓱᐃᓛᒃ ᐱᓗᓂ ᖃᐅᔨᒪᓇᕐᓗᓂ ᐊᑐᐃᓐᓇᐅᕕᒋᓗᒍ ᑌᑲᓂ ᑲᑎᕆᕕᓐᓂᒃ ᐃᓄᒻᒧᑦ ᐊᒻᒪᓗ ᐊᑕᐅᑦᓯᑰᕐᑐᓂ.  ᐅᖑᒪᓂᖅ ᐱᔭᐅᖁᓇᒋᑦ ᖃᓂᒻᒪᓯᕐᓄᑦ, ᑭᓯᐊᓂᑦᑕᐅᖅ ᓱᓕ ᐅᖑᒪᓂᖅ ᐱᒋᕗᖅ ᐱᒋᐊᖃᑦᑕᓂᕐᒥᑦ, ᐃᓅᖃᑎᒌᓄᑦ ᐃᓱᐃᑦᑐᓕᕕᖃᕐᓂᖅ.  ᕿᓚᕈᑦᔮᓯᒪᓂᕆᔦᑦ ᐃᒃᕕᑦ ᐱᑐᑦᓯᒪᒋᕗᖅ ᐅᕙᖓ ᐱᓐᓅᕙᖓ, ᑌᒫᒃ ᓖᓚ ᒍᐊᑦᓴᓐ, Murri ᒥᐅᖅ ᓴᓇᓐᖑᐊᑎᐅᑦᓱᓂ ᐱᓇᓱᐊᓕᓂᖅ ᓴᐳᓐᓂᐊᓱᓂ ᐱᒍᓐᓇᐅᑎᖏᓐᓂᒃ ᓄᓇᖃᒃᖄᑐᑦ ᐃᓄᖏᑦᑕ ᑌᑲᓂ Australiaᒥ ᐊᒻᒪᓗ ᓄᓇᓂ ᐊᓯᖏᓐᓂ, ᐃᒃᙯᑎᑉᐹᑎᒍᑦ.  ᐃᒃᕕᑦ ᐱᑦᓯᐊᑕᐅᓐᖏᓂᐊᓗᒻᒧᑦ ᐱᔭᐅᒍᑎᑎᑦ ᐅᕙᓐᓄᑕᐅᖅ ᐱᑐᑦᓯᒪᒋᕗᖅ ᑌᒣᑕᐅᓂᕐᓄᑦ ᐅᕙᖓ, ᐃᓓᒍᒪᒐᔭᕐᓱᖓ ᓲᕐᓗ ᐆᑦᑐᓘᑎᐅᑎᓪᓗᒍ, ᑫᒥᑕᐅᓗᖓ ᑖᑦᓱᒧᖓ ᐃᓱᒪᒋᔭᖏᓐᓄᑦ Franz Fanonᑉ.  ᑌᑰᓇ ᐅᑭᐊᖓᓂ 2020ᑉ, ᖃᓂᒻᒪᓯᐊᓗᒻᒧᑦ ᑎᑭᑕᐅᒪᓕᕐᓱᑕ ᑕᒃᕿᓄᑦ ᐊᒥᓱᒐᓛᓄᑦ, ᐊᓯᒋᒻᒥᔭᖓ ᖁᐊᕐᓵᓇᕐᑐᖅ ᐊᒃᖁᓴᐅᑎᔪᖅ ᑯᐯᒃ ᓄᓇᖓᒍᑦ.  Joyce Echaquan, ᑖᓐᓇ Atikamekw ᐊᕐᓇᐅᓱᓂ ᓄᓇᓕᒃ ᑌᑲᓂ Manawanᒥ, ᐊᐅᓚᔫᓕᐅᕐᒪᑦ ᐊᒻᒪᓗ ᑕᑯᔭᑦᓴᖑᕐᑎᓱᒍ ᑭᖑᓪᓕᐹᒥ ᐃᓅᓱᖓᓕᕐᓱᓂ, ᐃᓅᕕᒋᓚᐅᕐᑕᒥᓂᒃ ᓱᓇᖁᑕᐅᓇᓂ ᐊᑑᑎᑦᓱᒍ ᐊᒻᒪᓗ ᐅᕕᓂᖃᖃᑎᒋᔭᐅᓐᖏᓇᒥ ᓇᕐᕈᒋᔭᐅᓂᖅ ᑌᒃᑯᓄᖓ ᐋᓐᓂᐊᓯᐅᕐᓂᓕᕆᔪᑦ ᐱᓇᓱᑦᑎᖏᓐᓂᑦ, ᐃᑲᔪᕐᑎᓴᕐᓯᐅᓱᓂ ᐃᑲᔪᕐᑕᐅᒍᒪᐅᑎᖃᕋᒥ ᓈᓕᕆᑦᓱᓂ ᐋᓐᓂᐊᕕᐊᓗᖓᓐᓂ ᑖᕙᑦᓱᒪ.  ᑎᒥᒻᒪᕇᒪᑯᐊ ᐃᒻᒥᓅᑐᐃᓐᓇᑐᑦᓴᐅᔭᖏᒃᑲᓗᐊᕐᑐᑦ ᑲᒪᑦᓯᐊᕆᐊᖃᕐᓂᒧᑦ, ᐊᒥᓱᐃᓄᐊᖓᒋᕗᑦᑕᐅᖅ.  ᐊᒻᒪᓗ ᓱᓕ ᐱᓂᐊᕐᓂᓕᕆᐅᓯᐅᒋᕗᖅ ᑲᕙᒪᑎᓄᑦ.  ᖃᓂᒻᒪᓯᖅ ᐊᒻᒪᓗ ᖃᓪᓕᑕᐅᒪᓂᖅ.  ᐃᓚᖏᑦᑕ ᑎᒥᒻᒪᕇᑦ ᑐᓴᕐᕙᓚᑦᑕᐅᓯᐊᕐᓂᓴᐅᓲᒍᕗᑦ ᐊᒻᒪᓗ ᐅᖑᒪᔭᐅᑦᓯᐊᓂᕐᓴᐅᓱᑎᒃ ᐊᓯᒥᓐᓂᒥᑦ.  ᐃᓚᖏᑦ ᑎᒥᒻᒪᕇᑦ ᓯᕐᓕᕿᓗᐊᕐᓂᓴᐅᑎᓪᓗᒋᑦ ᐊᓯᒥᓂᑦ.  ᐅᑯᐊ ᓴᓇᓐᖑᐊᑏᑦ ᐃᓚᐅᓚᐅᕐᑐᑦ ᑖᑦᓱᒪᓂ ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ ᐱᓇᓱᐊᕐᓂᖓᓂ ᐃᒃᐱᒋᓚᐅᕐᒪᑕ, ᑐᑭᓯᒐᒥᐅᒃ ᐊᒻᒪᓗ ᖃᓄᐃᓕᒍᑎᒋᑦᓱᒍ ᑕᒪᓐᓇ ᐱᔭᕋᓕᓐᓇᑐᖅ ᐃᓅᕕᐅᔪᖅ ᐊᑐᕐᓱᒍ.  ᖃᓄᐊᓘᒃ ᖃᐅᔨᓐᖏᖑᐊᕈᓐᓇᐱᑖ, ᑖᑦᓱᒪᓂᓕ ᖄᓇ ᑐᒃᑑᑉ ᐱᓇᓱᐊᕐᑕᕕᓂᖓᓂ, ᐱᑦᓱᓂ ᑖᑦᓱᒪᓐᖓᑦ ᐊᕐᓇᒥᑦ ᕿᕐᓂᑕᐅᑦᓱᓂ ᐊᑐᕐᑎᓗᒍ ᒪᑐᓕᔭᕐᓱᓂ ᐃᒣᓕᖓᔪᓕᒻᒥᒃ ᑕᒐ “ᐊᓂᕐᑎᕆᔪᓐᓇᖏᑦᑐᖓ” ᐱᑦᓴᕋᓱᐊᓚᕿᐅᑎᒋᕙᕗᑦ ᐅᖄᒍᑎᓘᓇ ᑎᒃᑯᑑᑎᖓ ᒥᑦᓵᑎᓐᓄᑦ ᖃᓄᐃᓕᖁᔨᕙᓗᒍᑎᖓ ᐅᕙᑦᑎᓂᒃ? ᐊᒥᓱᒐᓛᑦ ᑖᑦᓱᒪᓂ ᐱᓇᓱᐊᕐᓂᐅᔪᒥ ᑐᑭᐊᒎᕐᑐᒥᒃ ᐊᑲᐅᓈᕋᒥ ᐃᒃᙯᑎᑦᓯᒋᐊᕈᑎ ᑕᒪᒃᑯᓂᖓ ᐃᕙᓗᓂᒃ ᐃᓕᑕᕆᐅᑎᒍᑎᓂᒃ ᐊᑑᑎᓯᒪᔭᒥᒍᑦ.  ᐃᓐᓇ ᑲᓇᑕᓕᒫᒥ ᑐᑭᓯᓴᕐᓂᖅ ᓂᐸᕐᓯᒪᔪᓂᒃ ᐊᒻᒪᓗ ᐃᓄᐊᕐᑕᐅᓯᒪᔪᓂᒃ ᑕᒫᓂᒥᐅᑦ ᓄᓇᑐᖃᓖᑦ ᐊᕐᓇᖏᓐᓂᒃ ᐊᒻᒪᓗ ᓂᕕᐊᕐᓯᐊᓂᒃ.  ᕿᕐᓂᑌᑦ ᐃᓅᓯᖏᑦ ᐃᓱᒪᓇᕐᓱᑎᒃ ᐱᓪᓚᕆᐅᒋᕗᑦ ᐊᐅᓚᑦᔭᕈᑕᐅᓂᖓᓂᒃ.  ᑕᒐ “ᓄᒃᖃᓕ ᑲᔪᓯᑦᓴᕈᓐᓀᓕ ᑲᓇᑕᐅᑉ ᐅᓪᓗᖓᓂᒃ ᐅᓪᓗᓯᐅᕈᑕᐅᓲᖅ” ᐱᓪᓚᕆᐅᑎᑦᓱᒍ ᐊᑐᕐᑕᐅᓲᖅ.  ᐊᑑᑎᔭᐅᓯᒪᔪᑦ ᑭᖑᓂᕐᒥ ᐅᓚᐱᑎᒋᕙᕗᑦ ᐅᓪᓗᒥ ᑌᒪᓗ ᐱᔭᕐᓃᑑᑎᑦᓯᓚᕐᒥᒃ ᓯᕗᓂᕆᓂᐊᕐᑕᑎᓐᓂᒃ.

ᑕᑯᔭᑦᓭᑦ ᐊᑦᔨᖑᐊᑦ, ᐱᓂᕐᓴᐅᒍᑎᖃᕐᐳᑦ ᐅᖃᕐᑕᐅᔪᓐᓇᑐᓂᑦ, ᑕᑕᒃᑲᒥᒃ ᖄᒥᑦᓱᑎᒃ ᐊᒥᓱᐃᒍᒍᓐᓇᑐᓂᒃ ᑐᑭᖃᕐᓗᑎᒃ ᐊᒻᒪᓗ ᑐᑭᖃᕐᑎᑕᐅᒍᓐᓇᒥᒐᒥᒃ ᖃᓄᑐᐃᓐᓇᖅ.  ᑕᒪᒃᑯᐊ ᐅᓂᒃᑳᐳᑦ ᑭᓪᓕᓯᐊᖓᓄᑦ ᐊᑑᑎᓂᕐᒥᒃ ᐊᒻᒪᓗ ᐃᓱᒪᒐᓱᐊᒍᑎᒋᓇᒍᓘᓐᓃᑦ ᐊᐅᓚᑦᔮᖀᓂᕐᒥᒃ ᑎᒥᑎᒍᑦ. ᓇᔫᑎᔪᒪᑯᐊ ᑕᑯᔭᐅᔪᓐᓇᖏᑦᑐᓂᒃ ᓯᓚᕐᕈᐊᑎᓐᓂᒃ ᐃᓅᕕᒋᑦᓱᒍ ᐆᒪᒥᑦᑕᑕ ᐃᒃᖃᓴᐅᑎᖏᓐᓂᒃ.  ᑕᑯᒥᓇᕐᑐᓕᐅᕐᓂᖅ ᐱᒍᓐᓇᓯᕕᒋᕙᕗᑦ ᐊᑕᐅᓯᐅᑦᑎᑐᑦ ᐃᒻᒥᑯᑦ ᖃᓄᐃᓕᓂᖓᓂᒃ ᖃᐅᔨᑦᓴᕈᕐᓗᓂ, ᐊᒻᒪᓗᑦᑕᐅᖅ ᓱᓕ ᐃᒃᐱᓇᕐᒥᓗᓂ ᐊᑕᐅᑦᓯᑰᕐᑐᓂ ᐃᓚᐅᕕᖃᕆᐊᒥᒃ ᐱᒋᔭᐅᒐᒥ ᐊᒻᒪᓗ ᐊᓯᒥᓄᑦ ᐃᓅᖃᑕᐅᓂᕐᒥᒃ ᐱᑐᒃᕕᖃᕐᓯᒪᓂᕐᒥᒃ.  ᐅᖑᒪᓂᐅᕗᖅ.  ᐅᓇ ᐅᖃᐅᓯᖓ ᑕᑯᔭᑦᓭᑦ ᐊᓪᓚᖑᐊᕐᓯᒪᓗᑎᒃ ᐊᒻᒣᒪᑕ ᓯᑦᑐᖓᑐᐃᓐᓇᖏᑦᑐᒥᒃ ᐱᒍᓯᕐᒥᒃ ᐃᓱᒻᒪᓯᐅᑦᓱᓂ ᐊᒻᒪᓗ ᐃᓱᒪᑖᕐᓇᑑᑦᓱᓂ ᐁᑦᑐᑑᑎᓂᕐᒥᒃ ᐃᒃᐱᓂᕈᓐᓇᑕᐅᔪᓂᒃ ᐊᒻᒪᓗ ᐊᑑᑎᓯᒪᔭᕆᔭᒥᒃ, ᕿᕐᓕᐅᑎᔪᖅ ᓇᓂᕈᐊᑐᑦ ᒪᓕᑦᓱᒍ ᐃᓅᓯᕆᓯᒪᔭᕗᑦ, ᑎᒥᑦᑎᓂᓗ ᐊᒻᒪᓗ ᐃᓱᒪᒋᑐᐃᓐᓇᑕᑦᑎᓂ.  ᑕᒪᓐᓇ ᓄᐃᑎᑦᓯᓚᕿᒍᓐᓇᕕᒋᓗᒍ ᑌᔭᐅᑐᐃᓐᓇᒍᓐᓇᖏᑦᑐᓂᒃ ᐅᖃᕐᓗᒋᑦ.  ᐃᒃᙯᑎᑦᓯᓗᓂ ᐅᖃᕐᑕᐅᖏᑦᑐᓂᒃ ᐊᒻᒪᓗ ᓄᐃᑕᑦᔭᖏᑦᑐᓂᒃ ᐱᓗᐊᕐᓱᒋᑦ ᐊᑑᑎᓯᒪᔭᕆᔭᖅ.  ᑌᑦᓱᑐᓇ ᐃᕙᓗᑐᑦ ᑌᑲᓂ ᐅᓕᕕᐊᑉ ᐱᖓᓱᐃᓕᖓᔪᒥᒃ ᐱᖁᓯᕆᓯᒪᔭᖏᓐᓂ, ᑕᑯᑦᔭᖏᑦᑕᕋᓗᐊᕗᑦ ᑭᓯᒥ ᑌᑲᓃᑦᓱᓂ, ᐱᑦᓴᖑᐃᔪᖅ ᐊᒻᒪᓗ ᑲᔪᓯᑎᑦᓯᔪᖅ ᐱᒍᒪᑦᓱᒍ ᓄᐃᑕᖓᓂᒃ, ᐱᒐᓱᐊᕐᓂᖅ ᐊᓂᒍᐃᑦᓱᒍ ᐃᖏᕐᕋᓂᕐᒥᓂ ᑕᑯᑦᓴᐅᖏᓐᓇᓲᒍᑦᔭᖏᒻᒪᑕ.  ᓯᕐᓕᕿᓂᖅ ᐃᓚᖏᓐᓄᑦ ᑕᑯᔭᐅᓲᒍᑦᔭᖏᑦᑐᖅ, ᑐᑭᓯᔭᐅᓇᓂ ᐊᒻᒪᓗ ᑲᒪᒋᔭᐅᓇᓂ, ᓱᒐᓗᑦᓱᓂ ᑌᒃᑯᓄᖓ ᖃᐅᔨᓲᒍᓐᖏᑐᓄᑦ ᑕᒪᒃᑯᓂᖓ ᐊᑑᑎᑦᔭᖏᓐᓇᒥᑦᔪᒃ ᖃᐅᑕᒫᕐᓯᐅᑎᒥᓂ.

ᑕᑯᒥᓇᕐᑐᓂᒃ ᓴᓇᓐᖑᐊᓂᖅ ᐱᕕᑦᓴᕆᕙᕗᑦ ᐱᑦᓴᖑᐃᒋᐊᒥᒃ ᐊᒻᒪᓗ ᐃᓅᕕᖃᕆᐊᒥᒃ ᐃᑎᔪᑎᒍᑦ ᖃᓂᑕᖃᕐᓂᒥᒃ ᐊᒻᒪᓗ ᓱᒐᓗᑦᑐᖅ ᓯᓚᕐᕈᐊᓂ, ᑌᒫᑎᒋᒃ ᐱᕕᑦᓴᑖᕐᕕᒋᒐᑦᑎᒍ ᓴᓇᒋᐊᒥᒃ ᐊᒻᒪᓗ ᓴᓇᒋᐊᑦᓯᐊᕆᐊᒥᒃ ᐃᓅᖃᑕᐅᕕᒋᔭᑦᑎᓂᒃ ᓯᓚᕐᕈᐊᒥᒃ ᐃᓅᕕᑦᓴᐅᒋᐊᓪᓚᐅᓂᐊᕐᑎᓗᒍ ᑕᒪᑦᑎᓄᑦ ᓇᐅᓕᒫᓄᑦ.  ᓴᓇᓐᖑᐊᓂᕐᒧᑦ ᐃᓇᑕᐅᕗᒍᑦ ᑕᒪᑦᑕ ᐊᒧᒍᓐᓇᓗᒍ ᑌᒃᑯᐊ ᐅᓂᒃᑳᑦ ᐊᓪᓚᓯᒪᔪᓪᓗ ᐃᕙᓗᖏᑦ ᐱᑦᓴᖑᐃᓲᑦ ᑐᑭᓯᒪᔭᐅᑦᓯᐊᖏᑦᑑᒍᓐᓇᑐᓂᒃ ᑐᑭᓯᔭᐅᑲᓪᓚᖃᔭᓐᖏᑐᓂᒃ ᐊᒻᒪᓗ ᐊᓯᑦᔨᔪᐃᑦᑐᓂᒃ ᓴᓇᒻᒪᓂᒃ.  ᑕᒪᓐᓇ ᐃᑲᔪᕐᑎᒋᕙᕗᑦ ᐃᓱᒪᓕᐅᕐᓂᒥᒃ ᐃᓱᒪᒋᐊᑦᓯᐊᓂᕐᒥᒃ ᐱᒋᐊᕐᓂᖓᓂᒃ, ᐃᓅᓯᖓᓂᒃ ᐊᒻᒪᓗ ᐱᑌᕈᓐᓂᖓᓂᒃ ᑐᖁᑦᓱᑎᒃ ᐃᓚᓗᐊᓐᖑᐊᖏᑦᑕ ᐅᓂᒃᑳᑐᐊᑦ, ᐃᓚᓗᐊᓐᖑᐊᖏᓐᓂᒃ ᑐᓴᕐᑕᐅᔪᑦᓴᓂᒃ.  ᓱᓕᓗ ᑕᒐ ᐱᕕᑦᓴᕆᒋᕙᕗᑦ ᑲᒪᒋᐊᒥᒃ ᓵᓪᓗᒍ ᐃᖏᕐᕋᑎᓪᓗᒍ ᒪᓐᓇ ᐱᑯᑦᓱᑕᐅᓂᖅ ᑕᒐ ᑕᒪᑦᑕ ᓇᒻᒪᑕᕗᑦ.  ᕿᒪᓪᓗᒍ ᐆᑦᑐᐸᑦᑕᕗᑦ ᐸᓯᔭᑦᓴᐅᖏᑦᑑᑎᒐᓱᐊᕐᓂᕗᑦ ᐊᒻᒪᓗ ᓴᖑᖔᖁᓪᓗᒍ ᓲᓱᑦᓴᖔᕐᓂᒧᑦ, ᑲᒪᒋᒍᓐᓇᓗᒍ ᐊᒻᒪᓗ ᐃᓱᒪᖃᖃᑎᒌᒍᑎᒋᓗᒍ, ᓱᖃᑦᓯᓚᑳᕐᓗᓂ ᐊᒻᒪᓗ ᓴᓇᑦᔫᒍᑎᐅᓗᓂ.  ᐃᒥᐊᔪᖅ ᐅᓇ ᑌᔭᐅᒍᑎᓕᒃ ᑖᑦᓱᒪ ᓂᐊᑉ ᐱᓇᓱᐊᕐᑕᕕᓂᖓ, ᐃᕙᓗ ᐃᓱᒪᒋᔭᕐᓄᑦ ᐅᓪᓗᒥ ᑕᓯᐅᕐᓯᒪᖓ ᐊᓪᓚᖑᐊᖁᓪᓗᖓ ᓄᐃᑎᓪᓗᒍ ᐊᑐᕐᓯᒪᔭᕋ ᖃᓂᒻᒪᓯᕐᒥ ᐃᒣᓕᐅᕐᓗᖓ ᑕᐅᑐᓪᓗᒍ ᓱᓇ ᑌᓐᓇ ᐃᓚᖓᒍᑦ ᑲᓱᕈᑎᒋᖃᑦᑕᓲᕗᑦ ᑲᑎᓚᕿᐅᑎᒋᑦᓱᒍ ᐊᒻᒪᓗ ᐃᓚᖓᒍᑦ ᐊᑦᓯᒪᐅᑎᒋᓚᕿᓲᕗᑦ, ᓱᓇᓗ ᐃᓚᖓᒍᑦ ᓄᓪᓚᐅᑎᒋᓲᕗᑦ ᐊᒻᒪᓗ ᓱᓇ ᐃᓚᖓᒍᑦ ᐋᓐᓂᐊᕈᑎᒋᓲᕗᑦ.  ᑕᒃᕙᓂᓕ ᐃᓱᒪᒋᓗᒍ, ᐊᐅᒡᒐᑕᐅᒍᓐᓇᓂᕗᑦ ᐊᑦᔨᖑᐊᓄᑦ ᐊᐅᓚᑦᔭᑕᐅᒍᑎᒋᓗᒍ ᐅᕙᒍᑦ, ᐊᒃᑐᐊᔭᐅᒍᑎᒋᓗᒍ ᐊᒻᒪᓗ ᑎᑭᐅᑎᑎᑕᐅᓗᑕ ᑕᒪᓐᓇ ᑌᒣᒍᓐᓇᐳᖅ.  ᑌᒃᑯᑎᑑᓇ ᐅᓕᕕᐊᑉ ᓴᐸᖓᓕᐊᖏᑐᑦ ᐊᕐᓴᓂᓐᖑᐊᑦ, ᐱᓇᓱᐊᕐᑕᐅᓂᖓ ᑕᑯᒥᓇᕐᑐᓕᐅᕐᓂᐅᑉ ᐋᒃᕿᓯᒪᑦᓯᐊᑐᓄᑦ ᑎᑭᐅᑦᔨᕗᖅ ᑕᑯᑦᓴᒥᒃ ᑐᑭᓯᓇᕐᓱᓂ ᐊᒻᒪᓗ ᐆᒻᒪᒥ ᐱᐅᓯᖃᕐᒪᑦ ᐃᓅᑉ ᑎᒥᒦᑦᑑᑉ ᐊᑐᕐᑕᖓᓄᑦ.  ᐅᓇ ᐱᒐᓱᐊᕈᑎᖃᕐᓂᑕ ᐱᓇᓱᐊᕐᓗᒍ ᐊᒻᒪᓗ ᒪᓂᔭᐅᓗᓂ ᐅᕙᑦᑎᓄᑦ ᐊᒥᓱᐃᓂᒃ ᑐᑭᖃᕈᓐᓇᓗᑎᒃ.  ᓇᒻᒥᓂᖅ ᑐᑭᓯᒪᐅᓯᖓᒍᑦ ᓯᕗᓪᓕᒥ, ᑌᒫᒃ ᐅᓕᕕᐊ ᐃᓱᒪᖃᕐᒪᑦ ᑕᑯᖁᓗᑕ ᐊᕐᓴᓂᕐᓂᒃ ᑌᒫᒃ ᑕᑯᒥᓇᕐᒪᑕ ᓲᕐᓗ ᑖᓂᓯᕐᑐᑦ ᐃᑯᒪᐅᑦᓱᑎᒃ ᖃᐅᒪᔪᑦ ᑖᕐᑐᒥ.  ᐅᓕᕐᓀᓯᓂᒃᑯᑦ ᑐᑭᖃᕐᒥᒪᑦᑕᐅᖅ ᓱᓕ.  ᑌᒃᑯᐊᓖ ᐊᕐᓴᓃᑦ ᐊᔪᒉᑦᑑᖏᓪᓚᑦ ᓯᓚᓯᐅᑏᑦ ᑕᑯᑦᓴᐅᖃᑦᑕᓲᑦ? ᐱᐅᓯᑐᖃᕐᑎᒍᑦ ᐊᒻᒪᓗ ᓴᓇᓐᖑᐊᕈᓯᑎᒍᑦ ᑐᑭᖃᕐᒥᓱᑎᒃ, ᑕᒐᓗ ᑕᒐ ᐊᕐᓴᓃᑦ ᑖᒃᑯᐊ ᐃᓚᖓᒍᑦ ᑕᐅᑐᑦᑕᐅᓲᒍᒋᕗᑦ ᓲᕐᓗᒎᖅ ᐊᓂᕐᓂᓖᑦ ᐸᑦᑕᖃᕈᓐᓇᑐᑦ ᓂᐊᖁᑦᑎᓂᒃ ᓈᓚᖃᑦᑕᖏᒃᑯᑕ ᐱᖁᔭᐅᒍᑎᑦᑎᓂᒃ, ᑕᑯᑦᓴᕈᓲᒍᒻᒥᓱᑎᒃ ᐅᕙᑦᑎᓄᑦ ᐱᐅᓯᖅ ᓴᓇᒪᔪᖅ ᓴᓇᓯᒪᑦᓱᓂ, ᐱᒻᒪᕆᑦᑕᖑᐊᖏᑦ ᑕᑯᒍᒥᓇᕐᑐᑦ ᐊᒻᒪᓗ ᑕᑯᒥᓇᕐᓱᑎᒃ ᐱᐅᔫᒧᑦ ᑕᒪᓐᓇ ᐊᒥᒐᓐᖏᑐᖅ ᓯᓚᕐᕈᐊᑎᓐᓂ.

ᓇᑯᕐᒦᒃ ᐃᓕᑦᓯ ᓄᓇᕕᒃ ᐊᒻᒪᓗ Gaspesie

ᓇᑯᕐᒦᒃ ᐃᓕᑦᓯ ᓴᓇᓐᖑᐊᑎᐅᔪᓯ.

ᓇᑯᕐᒦᒃ ᑖᓐᓇ ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᐅᑉ ᐱᓇᓱᐊᕐᑕᐅᓂᖓ

ᒪᓐᑐᔨᐊᓪ, ᐅᒃᑑᐸ 2021  

ᐃᓅᓱᓐᖒᒥᓐᓇᑐᖅ ᐊᓂᕐᓵᕕᒋᑦᓱᒍ

ᙯᒐᓕᔭᓕᕋᔭᕐᑐᖓ ᖁᖂᒪᓗᖓ ᐊᐅᓚᒍᓐᓇᑐᐊᕈᒪ

ᐲᕈᓐᓇᖏᐅᒪᕕᒋᑦᓱᒍ ᑕᒪᓐᓇ ᖃᓂᒪᓐᓈᓗᒃ

ᐃᓪᓕᖅ, ᒪᖏᑦᑕᖅ, ᐃᑦᓯᕙᐅᑕᖅ, ᐊᑭᓐᓇᖅ

ᐲᕈᓐᓇᖏᐅᒪᕕᒋᑦᓱᒍ ᑖᑦᓱᒪᓂ ᑎᒥᓐᓂ

ᐅᕕᓂᒃ, ᐊᐅᒃ, ᓴᐅᓂᖅ, ᑭᒍᑎ

“ᐱᑌᕈᒻᒪᑦ ᐋᒃᕿᓱᕐᓯᒪᔪᑎᒍᑦ ᐅᕕᓂᖃᖃᑎᒋᓐᖏᑕᕆᔭᒧᑦ ᓇᕐᕈᒋᔭᐅᓂᖅ”

ᓯᓚᕐᕈᐊᒥᐅᑎᒍᑦ ᑕᐅᕐᓰᖃᑎᒌᓐᓂᖅ

ᐊᒥᐊᖓ ᑖᓐᓇ ᓯᒡᒋᓲᖅ

ᓱᒋᐊᕐᐳᑎᑦ ᑌᒪ

ᖃᓯᓕᒍᑎᑎᑦ ᓄᐃᕗᑦ ᓂᓐᖓᐅᒪᔮᕐᓂᑎᒍᑦ

ᑌᓐᓇ ᐃᒐᓛᖅ ᑲᓱᕐᕕᒋᓲᕗᑦ ᐊᒻᒪᓗ ᐊᑦᓯᒪᐅᑎᒋᓚᕿᓲᕗᑦ

“ᐱᑌᕈᒻᒪᑦ ᐋᒃᕿᓱᕐᓯᒪᔪᒃᑯᑦ ᐅᕕᓂᖃᖃᑎᒋᓐᖏᑕᕆᔭᒧᑦ ᓇᕐᕈᒋᔭᐅᓂᖅ”

ᑕᒐ ᐃᒪᕐᐱᒃ ᖃᑯᕐᓕᒥᒃ ᖃᐅᒪᓂᓕᔮᕐᐳᖅ

ᐃᒃᐱᓂᐊᕈᑏᑦ ᑌᒪ ᑲᑎᕗᑦ

ᑕᐅᑑᒐᕐᑕᕆᔭᖅ ᑕᒐ ᐊᔪᕗᖅ

ᐃᓅᓱᓐᖒᒥᓇᕐᑐᒥᒃ ᐊᓂᕐᓵᕕᒋᑦᓱᒍ

ᓄᓇᖓᓂ Carleton-sur-mer, ᔫᓂ 2020